नेपाली कांग्रेसको १५औँ महाधिवेशन नजिकिँदै जाँदा पार्टीभित्र विभिन्न समूह र पेशागत क्षेत्रबाट महाधिवेशन प्रतिनिधिका लागि उम्मेदवारी तथा प्रचार अभियान तीव्र बनेको छ। महाधिवेशनलाई लक्षित गर्दै विभिन्न क्षेत्रबाट प्रतिनिधित्व सुनिश्चित गर्ने गरी उम्मेदवारहरूले आफ्ना प्रतिबद्धता र एजेन्डासहित मतदातामाझ पुग्न थालेका छन् ।
यसैक्रममा गगन थापा पक्षबाट पेशागततर्फ केन्द्रीय महाधिवेशन प्रतिनिधिका लागि अर्जुन बस्नेतले उम्मेदवारी अघि सारेका छन् । बस्नेतले ‘व्यवसायिकता, सिप र समृद्धिका लागि हाम्रो प्रतिबद्धता’ भन्ने नारासहित आफ्नो उम्मेदवारी प्रस्तुत गरेका हुन्।
पेशागत क्षेत्रबाट पार्टीको महाधिवेशनमा प्रतिनिधित्व गर्दै पेशागत समुदायका सवाललाई पार्टीको नीति, संगठन र निर्णय प्रक्रियासँग जोड्ने उद्देश्यसहित बस्नेतले उम्मेदवारी अघि बढाएका छन्। उनको प्रचार सामग्रीमा व्यवसायिकता, सीप र समृद्धिलाई प्राथमिकतामा राख्दै पेशागत क्षेत्रको आवाजलाई थप प्रभावकारी बनाउने विषयलाई जोड दिइएको छ।
लामो समयदेखि पत्रकारिता तथा सामाजिक क्षेत्रमा क्रियाशील बस्नेतले पेशागत क्षेत्रसँग सम्बन्धित सवाललाई पार्टीभित्र थप प्रभावकारी रूपमा उठाउने प्रतिबद्धतासहित प्रतिनिधिहरूसँग मत मागिरहेका छन्। संगठनलाई थप व्यवस्थित बनाउँदै पेशागत क्षेत्रको सहभागिता र भूमिकालाई बलियो बनाउने विषयलाई उनको उम्मेदवारीको मुख्य आधारका रूपमा प्रस्तुत गरिएको छ।
भोजपुरमा पनि १५ औँ महाधिवेशनको प्रक्रिया अघि बढाइरहेको अवस्थामा पेशागत क्षेत्रबाट बस्नेतको उम्मेदवारीलाई पनि सोही समूहको प्रतिनिधित्वका रूपमा हेरिएको छ ।
पेशागततर्फबाट केन्द्रीय महाधिवेशन प्रतिनिधिका उम्मेदवार बनेका बस्नेतले आफ्नो प्रचार सामग्रीमार्फत अधिकतम मतसहित विजयी गराउन अपिल गरेका छन् । उम्मेदवारीसँगै उनले पेशागत क्षेत्रको प्रतिनिधित्वलाई पार्टीको मूलधारमा थप प्रभावकारी बनाउने प्रतिबद्धता अघि सारेका छन्।
अब महाधिवेशनको निर्वाचन प्रक्रिया अघि बढेसँगै पेशागत तर्फका प्रतिनिधिहरूको मत कुन उम्मेदवारको पक्षमा जाने भन्ने विषयले पनि राजनीतिक वृत्तमा चर्चा पाउने देखिएको छ । कांग्रेसको १५ औँ महाधिवेशनमा विभिन्न पक्ष र समूहबीच प्रतिस्पर्धा हुने भएकाले पेशागत क्षेत्रबाट आएका उम्मेदवारहरूको भूमिका पनि महत्वपूर्ण हुने देखिन्छ।